Ávísingar til koronukanningar kostaðu eina millión

Ávísingarnar frá kommunulæknunum til koronukanningar hava kostað Heilsutrygd næstan eina millión krónur.

Leysliga mett eru 6000 ávísingar sendar Heilsutrygd, og hvør ávísing kostar 145 kr. Tað eru 870.000 kr.

Men í Heilsutrygd siga tey, at hetta er eitt bruttotal, tí tær nógvu koronuávísingarnar hava gjørt, at kommunulæknarnir hava ikki fingið gjørt ymiskt annað, sum teir fáa pengar fyri. 

Bara tey, sum heilsuverkið kannaði, skuldu hava ávísing.

Nú krevst ongin ávísing

Nú krevst ikki longur ávísing frá kommunulækna fyri at blíva koronukannað ella kannaður.

Tá læknavaktin 1870 skrivaði ávísingar, fekk tann, sum skrivaði tær, ikki hesar 145 krónurnar, men tímaløn, sigur Egil á Bø, stjóri í Heilsutrygd.

Tá korona kom til Føroya, gjørdu læknarnir av, hvør skuldi kannast fyri koronu. Ein læknalig meting varð gjørd um tað.

Men seinni fingu øll, sum bóðu um tað, ávísing til koronukanning.