Ferðavinnufyritøkur kunnu søkja um koronustuðul

Leygardagin kom í gildi kungerðin um covid-19 stuðul til ferðavinnufyritøkur.

Stuðulin er til fastar útreiðslur til og við í dag. Men kunngerðin er afturvirkandi til 12.mars í ár.

Umsókn um stuðul skal latast Taks í seinasta lagi 31.oktober í ár.

Uppskotið um kunngerðina varð gjørt hálvan juli, og tað hevur verið til hoyringar.

Skeinkistøðini, sum nú noyðast at lata aftur kl. 23.00 eftir boðum frá landsstýrinum, fáa pengar úr landskassanum, sambært kunngerðini. Tey fáa stuðul fyri tíðarskeiðið 8.august til 31.august.

Dagpengaskipanin longd

Lógin, sum gevur heimild at geva dagpengar í sambandi við koronu, skuldi eisini fara úr gildi á midnátt.

Men tann skipanin verður longd, sigur Elsebeth Mercedis Gunnleygsdóttir, landsstýriskvinna í almannamálum.

Tey, sum eru smittað, ella eru sett í sóttarhald og tí missa løn, hava rætt til dagpening.

Lønarískoytisskipanin, sum Als umsitur, fer eisini úr gildi á midnátt.

Nú í morgun eru 613 fólk í skipanini.