Stórur eldur í flóttafólkalegu á Lesbos

Stórur eldur herjaði í nátt flóttafólkaleguna, Moria, á griksku oynni Lesbos, og støðan í leguni er út av lagi vánalig, skrivar norski miðilin, VG.

Í leguni eru 13.000 fólk, og hetta er størsta flóttafólkalega í Evropa.

Herfyri var koronusmittan staðfest í leguni, og eldurin kyknaði eftir ósemju í leguni um koronutiltøkini í nátt, sigur ein, sum býr í leguni, við blaðið.

Klokkan trý í nátt brann í fleiri støðum í leguni, so talan er um eina vanlukku, sigur maðurin, sum er úr Afganistan.

Løgreglan legði uppí, og forðaði fólki at fara úr leguni.

Brunnin í grund

Í morgun ganga tíðindi um, at legan er brunnin í grund, skrivar blaðið.

Ein talsmaður fyri løgregluna sigur við Reuters, at øll flóttafólkini eru flutt til eitt trygt stað. AP skrivar, at nógv fólk eru flýdd úr leguni, og eingin veit, hvar tey eru.

Aðrar keldur siga, at løgreglan hevur eftirlit við minst 12.000 fólkum á vegnum uttan fyri leguna.

Um vikuskiftið var koronusmittan staðfest í Moria-leguni, og nú eru 35 fólk smittað, upplýsa myndugleikarnir. 

Eldur settur á

Fólk í leguni hava ikki fingið nóg góða kunning um koronutiltøkini, og tí kenna tey tað, sum tey verða tikin, tá fólk koma eftir teimum at kanna tey fyri koronu. Og tað er helst orsøkin til, at eldur varð settur á fleiri staðni.

Norska stjórnin hevur boðað frá, at landið fer eftir 50 flóttafólkum í leguni, tí tey hava biðið um at sleppa til Noregs.