Nú byrjar gerðarrættarmálið um Glasir

Fýra vikur eru settar av til málið, men ikki er greitt, nær úrskurðurin kemur

TG Verk hevur stevnt Landsverki eftir 75,5 milliónum krónum, og kravið hjá Landsverki er 80 milliónir

Mynd: Bjarni Árting Rubeksen

10.09.2020 - 11:50

Í viku 39, sum byrjar 21.september, byrjar stóra gerðarrættarmálið millum TG Verk og Landsverk um skúladepilin í Marknagili og arbeiðið har.

Fýra vikur eru settar av til málið, vikurnar 39, 40 og 41 og tveir dagar í viku 43, tilsamans 17 dagar.

TG Verk hevur stevnt Landsverki eftir 75,5 milliónum krónum, og kravið hjá Landsverki er 80 milliónir. Harafturat koma rentur frá tí degi, málið varð latið gerðarrættinum.

Byrjaði í 2016

Málið byrjaði í gerðarrættinum 4.apríl í 2016. TG Verk byrjaði málið.

Voldgiftsnævnet í Keypmannahavn viðger málið, og tað verður viðgjørt í Keypmannahavn. Sirius advokater umboðar Landsverk, og TG Verk hevur Dahl advokatfirma.

Eingin veit, nær gerðarrætturin kemur við úrskurðinum. Ikki er vist, at hann kemur í ár.

Úrskurðurin er endaligur, og hann kann ikki kærast.