Sáttmálin um landgrunnin lagdur fyri tingið

Ísland, Noreg og Føroyar/Danmark gjørdu fyri sløkum ári síðani sáttmála um føroyska landgrunnin norðanfyri.

Sambært honum verður føroyski landgrunnurin 27.000 ferkilometrar størri enn hann er nú. 

Men áðrenn sáttmálin kemur í gildi, skal hann millum annað góðkennast í løgtinginum og fólkatinginum, tí hann ásetur markið hjá danska kongsríkinum.

Jenis av Rana, landsstýrismaður í uttanríkismálum, legði í gjár fram uppskot til samtyktar um at góðkenna sáttmálarnar við Noreg og við Ísland.
 
Málið er eisini í løglistanum, sum fólkatingið fekk frá stjórnini fyrradagin.

Sáttmálin byggir á semju, sum varð gjørd í 2006.