ADHD-felagið: Fólk verða noydd í fyritíðarpensjón

ADHD-felagið mótmælir nú eisini fíggjarlógaruppskotinum, meira ítøkiliga broytingina í løgtingslóg um arbeiðsfremjandi tiltøk hjá Almannamálaráðnum.

Í skrivi til miðlarnar, sigur ADHD felagið, at tað er óvirðilig framferð at skunda eitt so týdningarmikið mál ígjøgnum við tí grundgeving, at stundir ikki eru til at senda uppskotið til ummælis og at umrøða uppskotið við aðrar partar.

Eitt arbeiði hevur stóran týdning fyri lívsgóðskuna hjá tí einstaka, at kunna avrika og vera ein partur av arbeiðsfjøldini á arbeiðsmarknaðinum.

Tørvur á arbeiðsmegi

Haraftrat vísir felagið á, at vit hava ein arbeiðsmarknað, sum hevur brúk fyri arbeiðsmegi, men at landsstýrið er í holt við at trýsta fólk í fyritíðarpensión - at arbeiðarin bert verður bert sæddur sum ein útreiðsla, og ikki ein, sum skapar nakað meirvirði.

- Hetta menniskjasýnið er virðisleyst og beinleiðis niðrandi, skrivar ADHD felagið.