Skulu fáa viðbót aftrat grundlønini

Føroya arbeiðsgevarafelag hevur nú eisini gjørt vart við seg í sambandi við ætlanina hjá landsstýrinum at broyta lógina um tillagað starv.

Felagið sigur millum annað, at neyðugt er at tryggja, at broytingin ikki brýtur ST-sáttmálan um tey, sum bera brek.

Annars sigur felagið, at arbeiðsgevarar eiga at kunna geva fólk viðbót aftrat grundlønini, uttan at hetta ávirkar útgjaldið frá Almannaverkinum.

Grundlønin er ásett í minstasáttmála.

Síðani kunnu arbeiðsgevarar samráðast við løntakaran um viðbøtur og aðrar ágóðar. 

Løna eftir førleika

Tað styrkir kappingarførið, at arbeiðsgevarar kunnu løna fólki eftir førleikum, royndum, arbeiðsuppgávum og ábyrgd, sigur Arbeiðsgevarafelagið.

Føroya arbeiðsgevarafelag mælir tí til, at fólk, sum hava tillagað starv, kunnu fáa viðbót afturat grundlønini, uttan at hetta ávirkar útgjaldið frá Almannaverkinum.

Føroya arbeiðsgevarafelag átalar enn einaferð staðiliga, at broytingaruppskot verða løgd fyri løgtingið, uttan at hava verið til hoyringar fyrst.

Lógaruppskotið hjá Almannamálaráðnum er, at markið fyri ískoyti frá Almannaverkinum til fólk, sum hava tillagað starv, minkar 2.100 krónur um mánaðin.