Tvey valevni aftrat í Hovi

Nú eru fimm fólk á listanum til kommunuvalið í Hovi.

Valnevndin hevði fund í gjárkvøldið, og tá fekk hon tvær kvinnur at stilla upp aftrat. Tær eru Jórun Mortensen og Sirið Hovsgarð.

Tá freistin at boða frá vallistum var úti, vóru bert trý fólk á listanum í Hovi. Tey vóru: Bergljót Ludvig, sum er varaborgarstjóri nú, og Jón Midjord, sum er limur í bygdaráðnum.

Saman við teimum var Delmar Tausen á listanum. Delmar hevur drúgvar royndir í kommunalpolitikki í Hovi, og hevur verið borgarstjóri í fleiri umførum. Hann hevur seinastu árini ikki havt sæti í bygdarráðnum.

Stillar ikki uppaftur

Núverandi borgarstjórin í Hovi, Jónsvein Hovgaard, hevur sitið fýra skeið í bygdaráðnum í Hovi, og hann hevur gjørt av ikki at stilla upp aftur.

Hann sigur, at nú eru fimm bygdarráðslimir í Hovi, men á nýggjárinum fór fólkatalið niður um 100, og tí skulu bert tríggir limir veljast í bygdarráðið hesaferð.

Nú fimm fólk eru á listanum, verða tvey av teimum varafólk í bygdaráðnum.