Viðgera fíggjarætlanina í kvøld

Tórshavnar býráð fer í dag at viðgera fíggjarætlanina fyri 2021 fyrru ferð.

Seinna viðgerðin verður 26.november.

Aftur næsta ár fer inntøkan hjá Tórshavnar kommunu upp um milliardina.

Í uppskotinum um fíggjarætlan fyri 2021 er inntøkan mett at verða ein milliard og 88 milliónir krónur, 23 milliónir, 2,2 prosent, meira enn í ár.

Óbroytt skattaprosent

Skattaprosentið í Tórshavnar kommunu verður tað sama næsta ár sum í ár, tað er 19.

Og barnafrádrátturin verður sum í ár 8.000 kr.

Tað fer at kosta 876 mió. kr. at reka Tórshavnar kommunu næsta ár. Og 156 milliónir eru settar av til íløgur. Tá er Tórshavnar havn ikki við.

Inntøkurnar hjá Tórshavnar kommunu higartil í ár eru trý prosent størri enn mett í fíggjarætlanini fyri 2020.