Leggja nýtt semingsuppskot fram í kvøld

Semingsmenninir høvdu fyrrapartin fund við felagið hjá sjúkrarøktarfrøðingunum, sum eru í verkfalli, og niðurstøðan var, at teir ætla at leggja nýtt semingsuppskot fyri partarnar í kvøld.

Terje Sigurðsson, semingsmaður, sigur við útvarpið, at samskiftið, sum semingsstovnurin hevur havt við partarnar í sáttmálatrætuni, hevur ikki víst, at partarnir hava flutt seg.

Hinvegin hava semingsmenninir vónir um, at partarnir kunnu taka av einum semingsuppskoti, sum teir "kunnu liva við," sum Terje Sigurðsson málber seg.

Terje Sigurðsson sigur, at hann hevur skilt, at sjúkrarøktarfrøðingarnir fara at leingja undantøkini, sum vórðu givin í gjárkvøldið, eitt samdøgur aftrat. Tey fara annars úr gildi klokkan trý seinnapartin.

Verður nýtt semingsuppskot lagt fram í kvøld, fáa partarnir freist til fyrrapartin í morgin at svara, sigur Terje Sigurðsson.