- Tíðindi, mentan og ítróttur
Kanna nú aftur myrkatøl
![](https://kvf.fo/sites/default/files/styles/grein-ovasta-mynd/public/blodroyndir_1.jpg?itok=VkIJbY-J)
1.500 føroyingar fáa í næstum bræv frá Deildini fyri Arbeiðs- og Almannaheilsu, her fólkini verða spurd, um tey vilja luttaka í eini kanning, ið skal varpa ljós á koronu-myrkatølini.
Hetta skal kannast, so myndugleikarnir fáa eina neyvari ábending um, hvussu nógvir føroyingar hava havt COVID-19, síðani fyrsta skrásetta tilburðin í landinum 3. mars.
Í miðal eru øll fólk í Føroyum kannað tríggjar ferðir fyri COVID-19, og hóast myndugleikarnir hava skrásett, hvussu nógv fólk hava havt smittuna í Føroyum, kann talið vera størri.
Neyvari mynd
Myrkatalskanningin, sum nú verður gjørd, skal geva heilsumyndugleikunum eina neyvari mynd av sanna talinum, sigur Deildin fyri Arbeiðs- og almannaheilsu.
Blóðroyndir verða tiknar í døgunum frá 21. til 30. november, tá heilsumyndugleikarnir fara runt landið at taka blóðroyndirnar.
Ein líknandi kanning varð gjørd í apríl, tá 1.075 føroyingar í øllum aldri luttóku í kanningini hjá heilsumyndugleikunum.