Gerðarrættarmálið útsett

Stóra gerðarrættarmálið millum TG-Verk og Landsverk er útsett fyribils. Tað váttar Sigurd Lamhauge, stjóri í Landsverki, fyri útvarpinum í morgun.

Gerðarrætturin varð settur 21. september, og fýra vikur vórðu settar av til málið, vikurnar 39, 40 og 41, og tveir dagar í viku 43, tilsamans 17 dagar.

Neyðugt var ikki at brúka alla avsettu tíðina, og seinasti rættarfundur var 9. oktober. TG-Verk hevur stevnt Landsverki eftir 75,5 milliónum krónum, og kravið hjá Landsverki er 80 milliónir.

Dómurin kann ikki kærast

Harafturat koma rentur frá tí degi, málið varð latið gerðarrættinum. Málið byrjaði í gerðarrættinum 4. apríl í 2016. TG-Verk byrjaði málið.

Voldgiftsnævnet í Keypmannahavn, sum er gerðarrætturin, hevur viðgjørt málið í Keypmannahavn.

Sirius advokater umboða Landsverk, og TG-Verk hevur Dahl advokatfirma. Dómurin í gerðarrættinum er endaligur, og kann ikki kærast.