HFS gjørt vegleiðing um fuglakrím

Heilsufrøðiliga starvsstovan sigur, at heimafuglur, so sum hønur, gæs og dunnur, eigur at verða fóðraður undir taki.

Mælt verður eisini til at reinsa fótbúnað áðrenn og eftir, at farið verður í høsnarhús og inngirðingar hjá heimafugli.

Fólk eiga ikki at nerta við sjúkan ella deyðan fugl. Og mint verður á altíð at vaska hendur eftir samband við djór.

Lítil vandi fyri smittu

Vandin fyri, at fuglakrím smittar fólk er sera lítil, sigur Heilsufrøðiliga starvsstovan. Fuglakrím er sjúka, sum allir fuglar kunnu fáa.

Sjúkan kann smitta frá villum fugli til heimafugl, antin beinleiðis frá fugli til fugl, ella óbeinleiðis umvegis umhvørvið. Virusið kann liva í umhvørvinum í minst 50 dagar. 

Vanlig sjúkutekin hjá smittaðum fugli eru niðursettur matarlystur, høvdið hovnar og fuglurin fær trupulleikar við andaleiðini. Sjúkan rakar fugl av høsnaslagi harðari enn fugl av dunnuslagi.