Vita ikki, um donsk skip koma í føroyskan sjógv

Løgmanni kunnugt hevur einki samskifti verið millum landsstýrið og donsku stjórnina um at loyva donskum skipum í føroyskan sjógv at fiska.

Tað svarar Bárður á Steig Nielsen, løgmaður, Beintu Løwe, løgtingskvinnu, sum hevur spurt málið.

Beinta Løwe vildi vita, um donsk fiskiskip eru á veg í føroyskan sjógv at fiska, nú Brexit verður veruleiki.

Hevur eisini spurt seg fyri

Løgmaður sigur, at hann hevur eisini spurt seg fyri hjá landsstýrismanninum í fiskivinnumálum og landsstýrismanninum í uttanríkis- og mentamálum, um teir kenna nakað til, at donsk skip vilja í føroyskan sjógv at fiska, um tey missa rættindi í bretskum sjógvi. Tað gera landsstýrismenninir ikki.

Teir hava heldur ikki fingið fyrispurningar, áheitanir ella annað frá donsku fiskivinnuni um møguliga atgongd til føroyskan sjógv at fiska, sigur Bárður á Steig Nielsen.

Fýra skip skrásett

Fýra fiskiskip eru fyrstu ferð skrásett í Føroyum síðani løgtingsvalið í fjør. Og Vørn kunnugt eru eingi donsk áhugamál upp í hesum skipum, sigur løgmaður í svarinum til Beintu Løwe.

Skipini eru Jógvan I, Klakkur, Gøtunes og Kambur