Kunngerð um óljóð frá skipum farin til hoyringar

Uppskotið um kunngerð, sum skal minka um ampa og skaðilig árin, sum óljóð frá skipum við bryggju hevur á fólk, sum búgva nærindis havnarløgum, er nú til hoyringar.

Hoyringarfreistin er til 4.januar.

Sambært uppskotinum koma fyrstu markvirðini fyri óljóð í gildi 1.juli næsta ár.

Markvirði fyri lágfrekvent óljóð frá skipum við bryggju, mátað innandura í bústøðum, bústovnum og sjúkrahúsum skal tá vera 27 desibell, millum klokkan 23.00 og 07.00, og 32 desibell um dagin og kvøldið.

1.januar 2023 lækkar markvirðið niður í ávikavist 23 og 28 desibell, og 1.januar 2025 niður í 20 og 25 desibell.

Lágfrekvent óljóð er, sambært uppskotinum um kunngerð, ljóð við frekvensi millum 10 og 160 hertz.

Umhvørvisstovan hevur eftirlit

Álagt verður havnarmyndugleikum fyri 1.juli næsta ár at máta lágfrekvent óljóð inni í bústøðum, bústovnum ella sjúkrahúsum, sum eru serliga ábær fyri óljóði frá skipum við bryggju.  

Umhvørvisstovan hevur eftirlit við, at kunngerðin verður hildin.

Havnarmyndugleikin avger sjálvur, hvussu hann sær til, at ásettu markvirðini verða hildin. 

Talan kann vera um at flyta skip, at vísa skipum burtur ella útvega skipum landsstreym, stendur í hoyringarskrivinum.

Røkir havnarmyndugleikin ikki sínar skyldur, kann Umhvørvisstovan geva honum boð um ítøkiligar atgerðir.