Danmark herðir koronutiltøkini munandi

Forsætismálaráðið í Danmark hevur boðað til tíðindafundar um koronustøðuna í dag. Tíðindafundurin verður klokkan 11.

Danska TV2 skrivar longu nú, at Mette Fredriksen, forsætisráðharri, fer at boða frá herdum tiltøkum í eini roynd at steðga koronusmittuni, sum hevur breitt seg nógv seinastu tíðina.

Skúlanæmingar fáa jólafrí mikudagin

Millum tiltøkini sum Mette Fredriksen fer at boða frá, er, at allir skúlanæmingar í 38 kommunum, sum ganga í fimta flokki og uppeftir, fara í jólafrí longu mikudagin.

Eisini vænta danskir miðlar, at matstovur, skeinkistøð, biografar og leikhús skulu lata aftur mikudagin, og at starvsfólk hjá tí almenna skulu arbeiða við hús.

Í gjár segði Mette Frederiksen, at tamarhald skal fáast á koronusmittuni fyri jól, og at hetta fer at krevja nógv av borgarunum.