Fekk bót fyri at bróta sóttarhald

Í Grønlandi fáa fólk sekt fyri at bróta sóttarhald.

Nú hevur ein 20 ára gomul kvinna í Nuuk fingið 3.000 kr. í sekt, tí hon fór á vertshús, hóast hon var í fimm daga sóttarhaldi eftir at hon var komin úr Danmark.

Kvinnan varð kannað, tá ið teir fimm dagarnir vóru farnir, og hon hevði ikki koronu.

Men sektina fær hon kortini.

Nøkur onnur fólk í Grønlandi hava eisini fingið sekt fyri ikki at halda sóttarhaldið. 

Eitt teirra varð seinni staðfest at hava koronu, skrivar KNR.