Heilsustarvsfólk verða fyrst koppsett

Heilsustarvsfólk og starvsfólk á ellis- og røktarheimum verða tey, sum fyrst fáa tilboð um at verða koppsett fyri koronu.

Tað upplýsir Kaj Leo Holm Johannesen, landsstýrismaður í heilsumálum, sum í løtuni hevur tíðindafund um koppsetingina.

Í fyrstu syftu fáa Føroyar góðar 4.000 skamtir av koppingarevni, og tað er nóg mikið at koppseta gott 2.000 fólk tvær ferðir.

Koppingarevnið kemur til landið millum jóla og nýggjárs, og ætlanin er at fara undir koppsetingina beinan vegin, sigur landsstýrismaðurin í heilsumálum.

Tey næstu í røðini at verða koppsett eru fólk, sum búgva á ellis- og røktarheimum, sigur Kaj Leo Holm Johannesen.