Macron fingið koronu

Franski forsetin, Emmanuel Macron, er smittaður av koronu.

Tað skrivar AP-tíðindastovan.

Eftir fronsku leiðbeiningunum skal Macron nú í sóttarhald í sjey dagar.

Franski forsætisráðharrin, Jean Castex, skal eisini í sóttarhald, skrivar AFP.

Sánchez eisini í sóttarhald

At Macron nú er smittaður fær eisini ávirkan uttan fyri Frakland, tí Macron var á fundi við spanska forsætisráðharran, Pedro Sánchez, mánadagin, og hann er eisini farin í sóttarhald, nú Macron er smittaður.

Ivamál eru nú eisini um fleiri aðrar evropiskar leiðarar, eftir at fleiri teirra hittust í síðstu viku, umframt at Macron var á fundi við franska forsætisráðharran í gjár.

The Guardian skrivar, at forsetin í Evroparáðnum, Charles Michel, eisini er farin í sóttarhald, eftir at hann hitti Macron mánadagin.

Talsfólk hjá Macron nevndi einki um, hvussu forsetanum veit við, men hann arbeiðir, meðan hann er í sóttarhaldi.