Fáa størri ferðaendurgjald í Eysturoyartunlinum

Tey, sum koyra til og frá arbeiði í Eysturoyartunlinum, fáa størri ferðaendurgjald úr landskassanum.

Og broytta endurgjaldið fer at hava afturvirkandi gildi. Tað lovar Jørgen Niclasen, landsstýrismaður, nú tað kostar at koyra í Eysturoyartunlinum.

Fyrireika uppskot

Landstýrismaðurin í samferðslumálum fyrireikar í løtuni eitt lógaruppskot at leggja fyri løgtingið

Jørgen Niclasen sigur, at tey, sum brúka Eysturoyartunnilin, og tey, sum fara at brúka Sandoyartunnilin, fáa størri endurgjald. 

Nýggja ferðaendurgjaldið verður galdandi frá í dag, hóast tað gongur ein mánaður ella so, til uppskotið kemur í tingið, sigur hann.

Stongdur um náttina

Almenna partafelagið boðar frá, at  Eysturoyartunnilin verður stongdur hvørja nátt, frá týskvøldinum 12. januar til týsmorgunin 19. januar, tí arbeitt verður í tunlinum.

Tunnilin er stongdur frá klokkan sjey á kvøldi, til klokkan sjey á morgni. Í hesum tíðarskeiði ber ikki til at koyra í tunlinum.