Brúka bara átta prosent til viðlíkahald

Landið brúkar bara góð átta prosent av tí, sum kemur í landskassan frá bilum, til at halda vegirnar viðlíka.

Í svari til Heðin Mortensen, løgtingsmann, sigur Jørgen Niclasen, landsstýrismaður, at landið fær 500 til 550 mio.kr. um árið í vegskatti og øðrum avgjøldum fyri bilar.

45 mió. kr. verða brúktar til at viðlíkahalda landsveganetið.   

Landið brúkti 284 mió. kr. til nýggar vegir og berghol í fjør, og ætlar at brúka 183 milliónir í ár. 

Landsverk metti í fjør, at eftirsleipið í viðlíkahaldinum í fjør var 375 mió. kr.

Jørgen Niclasen sigur, at ætlanin er at hækka játtanina til viðlíkahald stigvíst næstu árini.

Og tann hækkingin er longu byrjað.