Merkið fær toppkarakter

Føroyska flaggið fær toppkarakter á góðskulista yvir skipaskrásetingar.

Tað skrivar Vinnuhúsið á síni heimasíðu í dag.

Tað er International Chamber of Shipping, sum hvørt ár kunnger ein avrikslista yvir støðuna hjá altjóða skipaskrásetingum.

Avrikslistin gevur ábendingar um, hvussu teir einstøku flaggstatirnir um allan heimin klára seg. Tað greinar viðurskifti sum altjóða havnaeftirlit, ígildissetan av altjóða sáttmálum á maritima økinum, miðalaldur á handilsflotanum og luttøku á IMO-fundum. Gongdin seinastu árini er nógv betrað, og ein orsøk er eitt jaligt samstarv millum vinnu og myndugleikar, sigur Vinnuhúsið.

Góð tíðindi fyri handilsskip

Jens Meinhard Rasmussen, formaður í Reiðarafelagnum fyri handilsskip, sigur við Vinnuhúsið, at hetta eru góð tíðindi fyri føroysk handilsskip, tí tað hevur alstóran týdning, at føroyska flaggið verður sett í samband við trygd og góðsku á sjónum.

Kappingarførið hjá reiðaríum í føroysku altjóða skipaskránni, FAS, er knýtt at metingini av flagginum. Um flaggið ikki verður mett sum góðskuflagg, kann tað ávirka virksemið og raksturin hjá reiðaríum, eitt nú við øktum eftirlitsvitjanum og fleiri krøvum til avtalur, skrivar Vinnuhúsið.