Royking skal tálmast við at hækka sigarettprísin

Um fólk skulu fáast at leggja av at roykja, mugu tey fyrst merkja tað á pengapunginum.

Tað heldur grønlendski landsstýrisflokkurin Demokratarnir, sum nú vil hækka prísin á sigarettum í Grønlandi munandi. Júst hvussu nógv, er ikki heilt greitt enn, men 100 krónur fyri pakkan hevur verið nevnt, skrivar KNR.

Justus Hansen, sum er tinglimur fyri Demokratarnar, sigur við KNR, at endamálið serliga er at fáa ung fólk at lata vera við at byrja at roykja. Og sannlíkindini fyri at tey byrja, eru minni, um sigarettirnar kosta meir, sigur hann.

Meira enn helvtin roykir

Ein kanning í 2018 vísti, at meir enn helvtin av íbúgvunum í Grønlandi roykja sigarettir hvønn dag.

Í 2019 bleiv prísurin á einum pakka av sigarettum í Grønlandi hækkaður úr 82 krónum upp í 86,50 krónur. Men sølan av sigarettum er ikki minkað síðani príshækkingina.

Umframt at hækka prísin á sigarettum, halda Demokratarnir eisini, at tað skal verða lættari at fáa fatur á roykfríum nikotinvørum so sum e-sigarettum og snúsi - ikki tí tað er sunt, men tí tað ikki er so ósunt sum vanligar sigarettir.