Ríkisrættarmálið móti Trump heldur fram

Ein meiriluti í amerikanska Senatinum atkvøddi í gjárkvøldið okkara tíð fyri at halda fram við ríkirættarmálinum móti Donald Trump. 

56 senatorar atkvøddu fyri, at ríkisrættarmálið móti fyrrverandi forsetanum stríðir ikki ímóti stýrisskipanini.

Fleiri republikanarar og sakførarar hjá Trump hava annars grundgivið við, at tað er í stríð við stýrisskipanina, at eitt ríkisrættarmál verður reist móti einum fyrrverandi forseta.

Seks av teimum 50 senatorunum hjá republikanarunum atkvøddu fyri ríkisrættarmáli, meðan hinir atkvøddu ímóti.

Í minsta lagi 67 senatorar skulu atkvøða fyri, um forsetin skal verða funnin sekur. Hann er ákærdur fyri at hava eggjað til uppreistur í høvuðsstaðnum 6. januar.