390 mió. kr. til radaran á Sornfelli

390 milliónir krónur verða settar av til radaran, sum ætlanin er at seta upp á Sornfelli, í avtaluni um at styrkja donsku verjuna í Arktis.

TV2 skrivar, at tilsamans verða játtaðar 1,5 milliardir krónur til endamálið hetta til 2023. Og síðani verða 300 milliónir krónur settar av um árið.

Ætlanin er eisini at brúka 750 milliónir krónur til yvirvøku við dronum.

Stórur meiriluti

Ein stórur meiriluti tekur undir við avtaluni, skrivar TV2, sum hevur upplýsingarnar frá ónevndum keldum.

Flokkarnir, sum hava gjørt semjuna um at styrkja donsku verjuna í Arktis, eru sosialdemokratiski stjórnarflokkurin, Vinstri, Danski fólkaflokkurin, Radikali flokkurin, Konservativi flokkurin og Liberal Alliance.

TV2 skrivar, at fyrstu tiltøkini í verjusemjuni verða sett í verk í 2023, men tað ganga nøkur ár, til øll tiltøkini eru sett í verk.

Sum skilst, fer Trine Bramsen, verjumálaráðharri, at hava tíðindafund um málið í morgin.