Freistin at mótmæla byggisamtykt endar í dag

Freistin at mótmæla, ella at koma við broytingaruppskotum í sambandi við, at nýggja serstaka byggisamtyktin fyri Fossdalsgjógv við Velbastað skal broytast, endar í dag.

Tórshavnar býráð samtykti 17.desember í fjør uppskot um nýggja serstaka byggisamtykt, tí Gist og Vist ætlar at byggja matstovuna Koks við gjónna.

Uppskotið um at broyta byggisamtyktina verður síðani saman við mótmælum og broytingaruppskotum sent Býarskipanarnevnd landsins, sum ger tilmæli til landsstýrismannin í kommunumálum, Helga Abrahamsen. 

Hann tekur síðani avgerðina um byggisamtyktina. 

Friðingarmyndugleikarnir hava ikki viðgjørt málið enn. 

Málið um ætlaðu byggingina við Fossdalsgjógv er kært til Umhvørvisstovuna.

Tað hevur bóndin, sum hevur hagan, gjørt.