Noreg og ES stríðast um fiskiskap við Svalbard

Stríð hevur tikið seg upp millum Noreg og ES um fiskiskapin við Svalbard.

Orsøkin er, at ES hevur givið boð um, at skip úr ES-londunum kunnu fiska góð 28.000 tons av toski við Svalbard.

Norski fiskimálaráðharrin, Odd Emil Ingebrigtsen, sigur, at avgerðin hjá ES er ólóglig, og at Noreg finnur seg ikki í framferðini.

ES brýtur havrættarsáttmálan

- Noreg hevur einsamalt rætt til at áseta fiskiskapin við Svalbard, og at bert Noreg kann geva ES kvotu á leiðini.

Norski fiskimalaráðharrin sigur, at ES ger seg inn á rættin hjá Noreg og brýtur havrættarsáttmálan.

- Eg havi gjørt ES greitt, at allur fiskiskapur, sum er uttanfyri tað, sum Noreg hevur ásett, er ólógligur fiskiskapur, og at norska fiskiveiðueftirlitið fer at handfara fiskiskapin eftir lógini, sigur Odd Emil Ingebrigtsen í tíðindaskrivi til norskar miðlar.