Aksel og Høgni eru ivasamir um radaran

Meðan Jenis av Rana, landsstýrismaður, er væl nøgdur við tað, sum kom burtur úr fundinum við uttanlandsnevndina í dag, hevur Aksel V. Johannesen, formaður í Javnaðarflokkinum, somu ivamál, sum hann hevði í síðstu viku.

Høgni Hoydal, formaður í Tjóðveldi, sigur seg heldur ikki at hava fingið svar upp á síni ivamál. Hann vil ikki siga, um Tjóðveldi fer at taka undir við at seta radara upp á Sornfelli.

Hóast orðaskiftið um uppskotið frá Tjóðveldi um hernaðarmálið í tinginum í dag stundum hevur verið hvast, ber væl til hjá politiskum mótstøðumonnum at siga okkurt skemtiligt við hvønn annan. Her eru Høgni Hoydal og Jenis av Rana avmyndaðir í tingsalinum. (Mynd: Bjarni Árting Rubeksen)