Skrásetingin: Nógvir feilir í roknskapum

Nógvir feilir eru í roknskapunum hjá føroyskum fyritøkum. Í næstan øðrum hvørjum roknskapi, sum varð kannaður í fjør, vóru týðandi feilir.

Tað sigur Skráseting Føroya, sum kannaði 60 roknskapir fyri 2019.

27 teirra høvdu grannskoðaraátekning og 33 ikki.

Samanumtikið vóru feilir í 26 roknskapum, sum er 43 prosent av samlaðu roknskapunum.

Í sjey roknskapum, sum grannskoðarar høvdu grannskoðað, vóru feilir.

Hava stovnað níggju mál

Umframt hesar stakroyndirnar, hevur Skrásetingin í sambandi við móttøkueftirlitið við ársfrásagnum stovnað níggju mál. 

Hesi mál eru øll um áogn hjá nærstandandi pørtum, men nøkur mál eru um onnur viðurskifti eisini. 

Afturat hesum eru 12 vegleiðingarskriv send út til feløg viðvíkjandi ársfrásøgn felagsins fyri 2019.

Tann 31.desember 2020 vóru 3.483 feløg skrásett í partafelagsskránni hjá Skráseting Føroya.