Forsetin í Sýria fingið koronu

Forsetin í Sýria, Bashar al-Assad, og kona hansara hava fingið staðfest COVID-19.

Tað siga embætisfólk hjá forsetanum í einari fráboðan í dag, skrivar tíðindastovan Reuters.

Bæði forsetin og kona hansara hava mild sjúkutekin, ljóðar tað í fráboðanini.

Tey bæði hava tað gott og halda fram við at arbeiða heimanífrá meðan tey eru í sóttarhaldi.

55 ára gamli Bashar al-Assad hevur verið forseti í Sýria síðani 2000, tá hann tók við embætinum eftir pápa sín, sum var forseti frá 1971.