Danmark: Uttandura páskagudstænastur

Gudstænasturnar, sum verða í Danmark á páskum, verða hildnar uttandura. Tað skrivar Kristiliga Dagblaðið.

Frá mánadegnum kunnu í mesta lagi 50 fólk savnast úti, og danska fólkakirkjan ætlar nú at brúka høvið til kirkjuligar tænastur.

Seinastu dagarnar hevur trýst verið á politisku skipanini, tí fólk vildu hava boð um, hvussu verður við gudstænastunum á páskum.

Politiskur meiriluti fyri avgerðini

Fríggjadagin kom so loksins svarið frá donsku stjórnini, ið sigur, at koronutilmælini verða linkað eitt sindur.

Loyvið verður givið til, at 50 fólk kunnu savnast úti á páskum. Politiskur meiriluti er fyri avgerðini hjá stjórnini, sigur forsætisráðið í tíðindaskrivi.

Danska fólkakirkjan stendur fast við avgerðina um, at gudstænasturnar í kirkjunum skulu vera styttri enn hálvan tíma, og at kirkjufólkið ikki skal syngja, tí tá økist smittuvandin.