86 hoyringarsvar um broytta ferðaætlan

Strandferðslan fekk 86 hoyringarsvar frá fólki, tá stovnurin herfyri gav almenninginum høvi at gera viðmerkingar til ætlaðu broytingarnar hjá Bygdaleiðunum, sum koyra millum Havnina og økini norðan fyri høvuðsstaðin.

Tað er greitt, eftir at stovnurin hevur savnað øll hoyringarskrivini, sum komu inn í tíðarskeiðnum frá fyrst í mars til mikudagin í seinastu viku, tá freistin at viðmerkja var úti.

Strandferðslan gjørdi fyrst í mars av at broyta nakrar leiðir hjá Bygdaleiðum eftir atfinningar, sum vóru frammi, tá Eysturoyartunnilin læt upp.

Strandferðslan ásannaði, at ferðslumynstrið er broytt, og at stovnurin tí má broyta leiðirnar, sum koyra millum Havnina og økini norðanfyri.

Broytingarnar koma eftir ætlan í gildi 1. apríl.