Fyrsta løtan móti Eysturríki skal endurtakast

Tað sá gott út fyrsta hálva tíman í dystinum móti Eysturríki. 

Sonni Ragnar Nattestad skallaði Føroyar framum, og miðverjin var eisini nær við at økja til 2-0, áðrenn Eysturríki skeyt trý mál síðsta korterið í fyrra hálvleiki.

Í kvøld skulu Føroyar spæla ímóti Skotlandi á Hampden Park, og liðskiparin á føroyska landsliðnum, Hallur Hansson, sigur, at góða byrjanin móti Skotlandi skla endurtakast, og ringastu feilirnir skulu lúkast burtur.

 - Teir fyrstu 30 minuttirnir móti Eysturríki, um vit kunnu halda fast í eini slíkari gongd eitt sindur longur, sigur Hallur Hansson.

 - Liðini, sum eru ring at skora ímóti standa seg betur, so vit mugu gevast at geva býtt mál burtur, serliga upp á deyðbóltar, har vit eiga at vera sterkir.

Væntar eina líka dystargongd sum móti Eysturríki

Skotland hevur fingið tvey stig í tveimum teimum fyrstu dystunum hjá sær móti Eysturríki og Ísrael, og eru undir trýsti undan dystinum móti Føroyum. 

Hjálparvenjarin hjá føroyska landsliðnum, Eli Hentze, væntar, at leikgongdin í dystinum á Hampden Park fer at líkjast henni ímóti eysturríkarum.

 -  Tað er sannlíkt, at skotar fara at hava bóltin eitt vet meir, enn vit fara at hava, men tað skal eingin ivi vera um, at vit eisini fara at bjóða av á mótstøðuhálvuni, sigur Eli Hentze.