Samgongan og Sjálvstýri bíða eftir landsstýrinum

Tað siga Magnus Rasmussen, Jákup Mikkelsen, Bill Justinussen og Kristin Michelsen í álitinum hjá Fíggjarnevndini, um uppskotið hjá Tjóðveldi um at endurnýggja flotan hjá strandfaraskipum landsins.

Teir taka undir við, at neyðugt er at endurnýggja flotan. Og Teir undrast á, at eingin ætlan er gjørd um hetta fyri nógvum árum síðani. 

Men teir halda nú, at skilagott er at bíða eftir úrslitinum hjá nevndini, sum Jørgen Niclasen, landsstýrismaður, fer at seta fyrsta dagin, og síðani eftir politisku viðgerðini.

Teir mæla frá at samtykkja uppskotið hjá Tjóðveldi.

Annars vísa teir á, at í langtíðar-íløguætlanini eru settar av 200 mió. kr. fyri árini 2025, 2026 og 2027.

Minnilutin í Fíggjarnevndini, Aksel V. Johannesen, Páll á Reynatúgvu og Ruth Vang, mæla til at samtykkja uppskotið.

Sambært uppskotinum hjá Tjóðveldi skulu byggjast fýra skip fyri 330 mió. kr.

Arbeiðið skal byrja longu í ár og vera liðugt í 2026.