Ætla at umvæla lendingina í summar

Ætlanin er at umvæla lendingina í Skúgvoy í summar, um til ber at finna pengar til umvælingina.

Tað sigur Jørgen Niclasen, landsstýrismaður, sum hevur svarað spurningi frá Brandi Sandoy, løgtingsmanni.

Lendingin í Skúgvoy er illa farin og krevur ábøtur.
   
Jørgen Niclasen sigur, at Landsverk hevur kannað fyribils havnarlagið í Skúgvoy, og heldur fram við verkætlanini.

Brandur Sandoy sigur, at fyri nøkrum árum síðani byrjaði at brotna burtur av betonginum í lendingini í Skúgvoy.

Nú er hetta brotið vorðið so stórt, at stórur vandi er fyri, at fólkaskaði stendst av, tá nakað er at í sjónum, og fólk er á lendingini, tá Sildberin kemur.