Skotar á val: Áhugin fyri loysing minkaður

Í seinasta formansumfarinum undan valinum tók fyrstiráðharrin og forkvinnan í tjóðskaparflokkinum, SNP, Nicola Sturgeon, afturíaftur lyfti um at skipa fólkaatkvøðu um loysing um tvey ár, tað við siga seint í 2023.

Hon legði áherðslu á, at tað krevur, at SNP fær góða undirtøku og greiðan meiriluta á valinum. Men sum støðan er nú, at tað alt annað enn vist, at flokkurin fær so nógvar atkvøður.

25 flokkar stilla upp til valið hesaferð um teir 129 sessirnar í parlamentinum. Skotar hava tvær atkvøður á valinum.

Onnur verður givin beinleiðis til eitt valevni í valdøminum, har fólk búgva, og valevnið, sum fær flestar atkvøður, fær automatiskt ein sess í parlamentinum.

73 valdømi í Skotlandi

Hin atkvøðan er til teir 56 landspartasessirnar, sum kappast eisini verður um. Hvør vinnur tað valið verður avgjørt við, at skotar lata sína atkvøðu beinleiðis til ein flokk í økinum, har fólk búgva.

Skotland er býtt í átta landspartar. Flokkarnir kunnu síðani við hjálp frá atkvøðunum tryggja sær fleiri sessir í parlamentinum.

Sambært YouGov-meiningakanningini, sum varð gjørd 16. - 20. apríl, fær SNP stuðul frá 49 prosentum til lokala valevnið, og 39 prosent á valinum, har atkvøðan verður latin beinleiðis til ein flokk.

Áhugin fyri loysing minkaður

SNP er sostatt greitt á odda. Men tað er ikki vist, at flokkurin fær stóra sigurin, sum honum leingist eftir. Tí spurningurin er, um áhugin fyri loysing er minkaður í Skotlandi.

Í 2020 vaks undirtøkan fyri loysing munandi í flestu meiningakanningum. Men nú vísa meiningakanningar, at áhugin er minkaður.

Í YouGov-meiningakanningini tíðliga í august í fjør tóku 53 prosent av teimum spurdu undir við loysing, og 47 prosent vóru í móti.

Kann vera torført at nokta fólkaatkvøðu

Sambært YouGov-meiningaknningini frá 16. - 20. apríl í ár eru tølini nú býtt um, 47 prosent taka undir við loysing og 53 prosent eru í móti. Tey, sum ivast, eru ikki við í tølunum.

Formelt er tað stjórnin hjá Boris Johnson, sum ger av, um skotar kunnu skipa fyri fólkaatkvøðu um loysing.

Men fær SNP-flokkurin nóg góða undirtøku á valinum í dag, kann tað vera torført hjá Boris Johnson at sýta skotum fyri at skipa fólkaatkvøðu.