Andstøðupolitikari roynir at skipa stjórn í Ísrael

57 ára gamli andstøðupolitikarin, Yair Lipad, úr miðflokkinum Yesh Atid fær nú møguleikan at skipa stjórn í Ísrael. 

Tað skrivar Ritzau.

Tað er ísraelski forsetin, Reuven Rivlin, sum hevur latið Yair Lipad samráðingarættin, tí sitandi forsætisráðharrin, 71 ára gamli Benjamin Netanyahu, ikki kom á mál við samráðingunum. 

Likud-flokkurin hjá Netanyahu fekk annars flestar atkvøður á valinum, men megnaði ikki at fáa neyðugu parlamentarisku undirtøkuna fyri at fáa meiriluta í Knesset. 

Sambært Reuven Rivlin, hevði Netanyahu bara undirtøku frá 56 av teimum 120 limunum í Knesset.

Hevur 28 dagar

Miðflokkurin Yesh Atid fekk næstflestar atkvøður á valinum 23. mars.

Eydnast tað ikki Yair Lapid at skipa stjórn, er líkt til, at neyðugt verður við nývali. Tað verður fimta valið í Ísrael í tvey ár.

Benjamin Netanyahu hevur verið forsætisráðharri í Ísrael síðani 2009. Hann var eisini forsætisráðharri í trý ár í 90'unum. 

Formaðurin í Yesh Atid hevur fingið 28 dagar til royndina at skipa stjórn.