Bjarki og Sarah til oyggjaleikirnar

Sarah Vallin og Bjarki Johannessen vunnu føroyameistaraheitið í hálvmaraton, sum var í Klaksvík um vikuskiftið. 

Samstundis runnu bæði tvey undir kravtíðina til oyggjaleikirnar á Guernsey, sum verða í 2023. 

Bjarki Johannessen rann 21 kilometra teinin upp á 1.14.39, 21 sekund undir kravtíðina, sum er 1.15.00. Hann fekk góða hjálp frá hinum øðrum rennarum. 

 - Eg visti, at formurin lá nøkulunda til at klára oyggjaleikakravið, so eg havði avtalað við Peter (Jensen, red.), um hann kundi hjálpa mær eitt sindur, og Rógvi (Kárason, red.) hektaði seg so uppá, og vit fylgdust til 12 kilometrar, og so mátti eg taka oddasessin, sigur Bjarki Johannessen.

Spenningur var eisini, um Sarah Vallin fór at renna undir kravtíðina hjá kvinnum upp á 1.27.00. Tað megnaði hon væl og virðiliga. Hon vann við tíðini 1.24.55.

Úrslit, menn:
1. Bjarki Johannesen (Roysnið): 1.14.39
2. Rógvi Kárason (Bragdið): 1.17.15
3. Peter Jensen (Bragdið): 1.18.25

Úrslit, kvinnur:
1. Sarah Vallin (Bragdið) 1.24.55
2. Ella Áarstein (Treysti) 1.43.04
3. Hergerð Heldarskarð (Bragdið) 1.43.38

sarah_vallin_mynd.jpg