Fáa ikki at vita, hvat fyrisitingin segði

Løgtingsfólk fáa ikki at vita, hvat fyrisitingin í Almannamálaráðnum segði um stýrislimirnar í Bústøðum.

Elsebeth Mercedis Gunnleygsdóttir, landsstýriskvinna, hevur svarað Høgna Hoydal og Beintu Løwe, tingfólkum, at landsstýrisfólkið tilnevnir stýrisliminar.

Hon sigur, at hon ætlar ikki at upplýsa um innanhýsis skjøl hjá fyrisitingini, sum heldur ikki alment innlit er latið í.

Elsebeth Mercedis Gunnleygsdóttir hevur valt fimm fólk í stýrið hjá Bústøðum. Hon svarar, at lógin sigur einki um, hvør skal koma við tilmæli um stýrislimir.

Umboð úr egnu fyrisiting

Millum annað varð spurt, um hon vildi, at nýggi stýrisformaðurin skuldi vera umboðið úr hennara egnu fyrisiting, Almannamálaráðnum. 

Landsstýriskvinnan varð eisini spurd um kæruna hjá nývaldum stýrislimi um stjóran og leiðsluna í Býstøðum.

Har er svarið, at Almannamálaráðið kannar eitt mál, um Bústaðir hava fyrisitið rætt. 

Eingin niðurstøða er gjørd í málinum enn.