Vil ikki vita av donsku verjuætlanini í Arktis

Treytin er, at Grønland tekur undir við avtaluni.

Tað sigur Trine Bramsen, verjumálaráðharri, við grønlendska kringvarpið KNR.

Ætlanin hjá donsku stjórnini at økja um eftirlitsorkuna og verjuna í Arktis hevur fingið eitt skot fyri bógvin, tí Pele Broberg, landstýrismaður í uttanríkismálum í Grønlandi, sigur, at hann vil ikki vita av donsku ætlanini.

Sambært ætlanini hevur danska stjórnin millum annað sett pening av til lofteftirlitsdronur í Grønlandi og nýggja verjuútbúgving í Grønlandi.

Grønlendskir politikarar ikki spurdir

Men Pele Broberg sigur, at avtalan um arktiska kapasitetspakkan er gjørd, uttan at grønlendskir politikarar vórðu spurdir.

Trine Bramsen leggur dent á í skrivligum svari til KNR, at treytin fyri, at avtalan um arktiska kapasitetspakkan verður framd í verki er undirtøka í Grønlandi og ikki bara í Grønlandi, men eisini í Føroyum. 

390 mió. kr. eru settar av til nýggjan lofteftirlitsradara á Sornfelli.

Hervaldið takast av

Pele Broberg sigur, at Grønland hevur eina greiða ætlan um at taka av hervald, og er tí hvørki áhugað í donskum dronum, verjuútbúgvingum ella, at danski herurin er í Grønlandi.

Pele Broberg vil heldur, at grønlendingar skulu útbúgvast til at manna eina sivila vaktar- og bjargingartænastu.

Hon skal hava íslendsku vaktar- og bjargingartænastuna sum fyrimynd.