- Tíðindi, mentan og ítróttur
Góðan morgun Føroyar
- Sjálvur treivst eg ongantíð so væl í skúlanum, og eg havi nokk verið tann næmingurin, sum lærarar fingu grá hár í høvdið av. Kanska er tað júst tí, at eg havi roynt at lagt meg eftir, at allir næmingarnir, sum koma á skúlan, skulu fáa nakað burturúr og trívast. Eisini tey, sum av ymsum orsøkum ikki hava tað so lætt.
Orðini eigur Guðmundur Joensen, sum seinastu fimm árini hevur verið leiðari á ítróttarháskúlanum í Vági.
Tá hann tók við starvinum í mai 2016 var tað ein stór, men spennandi uppgáva, ið lá fyri framman.
- Eg mátti finna útav, hvat hetta skuldi vera fyri ein háskúli og harvið gera konseptið. Tað var ótrúliga spennandi og stuttligt, men tað kravdi eisini, at eg arbeiddi sera nógv hasa fyrstu tíðina. Ja, onkrar nætur koma eg ongantíð í song, tí tað var so nógv at fyrireika og seta seg inn í, sigur Guðmundur Joensen.
Í morgunsendingini greiddi hann frá teimum fimm árunum á skúlanum, nú hann tann 30. juni hevur seinasta arbeiðsdag.