Eingin gongd gjøgnum Lamba

Yvirfriðingarnevndin hevur heitt á Helga Abrahamsen, landsstýrismann, um at koma við einari friðingarkunngerð um Lamba og Dalin í Mykinesi fyri at verja lundan. 

Friðingin eigur at siga, hvussu nógv fólk kunnu ganga gjøgnum økið og nær í samdøgrinum, tey kunnu ganga har. 

Og eftirlit eigur at vera við hesari ferðsluni, mælir Yvirfriðingarnevndin til.

Nýggj brúgv

Mykinesfólk hava avgjørt, at í ár verður eingin gongd gjøgnum Lamba, nú Landsverk hevur boðað frá, at nýggj brúgv út í Mykineshólm verður gjørd í summar. 

Ferðafólk sleppa tí einans út á Rógvu, haðani gott útsýni er yvir lundalandið og Mykineshólm. 

Yvirfriðingarnevndin fekk í fjør áheitan frá Umhvørvisstovuni, Visit Faroe Islands, Tjóðsavninum og Havstovuni um at fara undir at fáa Lamba og Dalin í Mykinesi friðaðar.