Nertið ikki við sjúkan ella deyðan fugl

Heilsufrøðiliga starvsstovan biður fólk um ikki at nerta við sjúkan ella deyðan fugl, men at boða Heilsufrøðiligu starvsstovnuni frá, um tey finna sjúkan ella deyðan fugl.

Fuglakrím plágar nógv grannalond, og nú í august er fuglakrím staðfest hjá skúgvi á oynni Fair Isle í Hetlandi.

Fuglakrím er ongantíð staðfest í Føroyum. 

Fyri at avmarka vandan fyri smittuni, er forboð sett fyri at innflyta livandi fugl og egg til klekingar. 

Allir fuglar kunnu fáa krím

Allir fuglar kunnu fáa fuglakrím, eisini hønur, gæs og dunnur.

Vandin fyri, at sjúkan smittar fólk er sera lítil.

Virus kann yvirliva í umhvørvinum í minst 50 dagar. 

Vanlig sjúkutekin hjá smittaðum fugli eru niðursettur matarlystur, høvdið hovnar, og fuglurin fær trupulleikar við andaleiðini.