Umlætting um summarið hevði kostað fimm milliónir

Tað hevði kostað fimm milliónir krónur at havt umlætting hvønn dag, eisini um hásummarið.

Tað sigur Elsebeth Mercedis Gunnleygsdóttir, landsstýriskvinna, í svari til Brand Sandoy, løgtingsmann, sum spurdi, hví umlættingar- og dagtilboð til børn og ung við autismu, fjølbreki og øðrum eru stongd tríggjar vikur hvørt summar.

Yvirskipað kann sigast, at fíggjarliga rásarúmið ikki er óavmarkað, svarar landsstýriskvinnan.

Tí er neyðugt at raðfesta, hvussu játtanin best verður gagnnýtt. 

Gongst illa at fáa frítíðaravloysarar

At hava stongt nakrar vikur um summarið gevur størri fíggjarliga orku til tænasturnar restina av árinum. 

Men orsøkin er ikki bara fíggjarlig.

Tað gongst eisini illa hjá Almannaverkinum at fáa frítíðaravloysarar.

Almannamálaráðið og Mentamálaráðið fara at útbúgva fleiri fólk, so nóg nógv vera til taks hjá Almannaverkinum og í heimatænastu og eldrarøkt, upplýsir Elsebeth Mercedis Gunnleygsdóttir, landsstýriskvinna.