Juli besti gistimánaðurin yvirhøvur

Ongantíð fyrr hava so nógv fólk gist í Føroyum sum í juli. Talan var um 31.300 gistingar í juli, og tað er besti mánaður nakrantíð, skrivar Hagstovan.

Samanborið við juli í fjør er talið av gistingum vaksið knappliga 50 prosent. Samanborið við juli í 2019, sum hevði gamla metið, er vøksturin 25 prosent.

10.200 fleiri gistinætur

Í juli vóru góðar 10.200 fleiri gistinætur samanborið við sama mánað í fjør. Gistinætur telja, hvussu nógv og hvussu leingi fólk gista á gistingarhúsum.

Talið av gistináttum hjá dønum vaks í juli sløk 36 prosent samanborið við sama mánað í fjør. Talið av gistináttum hjá fólki úr øðrum londum enn Føroyum og Danmark meira enn tvífaldaðist.

Føroyingar eiga stóran fjórðing

Føroyingar áttu stóran fjórðing av gistináttunum í juli. Seinasta árið hevur talið hjá føroyingum annars ligið um 60-70 prosent.

Umleið 75 prosent av kømrunum vórðu brúkt í juli, samanborið við 63,5 prosent í fjør. 

Í 2019 var nýtslustigið 90 prosent, sum er tað mesta, ið hevur verið. Í fjør vaks talið av kømrum munandi, tí tvey størri gistingarhús lótu upp. Onnur vórðu útbygd, og tí er rúm er fyri fleiri vitjandi.