Biden: Tit skulu gjalda fyri hetta

13 amerikanskir hermenn lógu eftirá í bumbuatsóknunum í Kabul í gjár. Harumframt vórðu 18 amerikanskir hermenn særdir, sigur Bill Urban, herovasti.

Ongantíð seinastu 10 árini eru so nógvir amerikanskir hermenn falnir ein dag. 6. august í 2011 fullu 30 amerikanskir hermenn í álopi, skriva fleiri amerikanskir miðlar.

Samstundis er tað halvtannað ár síðani, tann seinasti amerikanski hermaðurin fall í Afganistan. Tað var í februar í fjør, stutt fyri at USA og Taliban gjørdu eina friðaravtalu.

Hóast álopið var ógvisligt, so heldur USA fram við at flyta fólk úr Afghanistan. Pentagon uppýsir, at umleið 1.000 amerikanskir ríkisborgarar framvegis eru í landinum.

Amerikanski forsetin, Joe Biden, helt røðu í gjárkvøldið.

Hann segði, at tey, sum fullu í gjár, virkaðu fyri at tryggja okkum øðrum frælsi.

Vit koma eftir tykkum

- Vit fara ikki at fyrigeva, vit fara ikki at gloyma, vit koma eftir tykkum, og tit skulu gjalda fyri hetta, segði hann.

Forsetin gjørdi vart við, at USA fer at halda fram við at flyta fólk úr Kabul.

- Islamskur Statur skal ikki vinna, segði Joe Biden.

Islamskur Statur hevur tikið ábyrgdina av báðum atsóknunum í Kabul í gjár.