Góður streymur til útróður

Bara eitt línuskip er til fiskiskap, og Fiskamarknaður Føroya roknar við, at okkurt línuskip fer avstað í vikuni. Tey flestu frystilínuskipini eru til fiskiskap.

Viðvíkjandi útróðri, so verður streymurin góður, og veðrið verður eisini gott meginpartin av vikuni, so helst verður nakað av útróðri. Men fiskiskapurin er smáligur. Bátarnir fiska mest hýsu.

Ein djúpvatnstrolari er til fiskiskap, og hann fiskar kongafisk.

Flestu partrolararnir eru til fiskiskap. Teir fiska upsa og so nakað av hjáveiðu, men fiskiskapurin er smáligur.

Allir trolbátarnir liggja við bryggju, men møguliga fer onkur út í vikuni.

Tvey garnaskip fiska svartkalva. Fiskiskapurin er smáligur.  Eitt fiskar havtasku, og hjá tí er fiskiskapurin brúkiligur, skrivar Fiskamarknaðurin í meting fyri hesa vikuna.