Ætla at endurnýta grótið í byrgingini

Ikki er neyðugt at brúka grót úr bergholunum norður um Fjall til byrgingina í Haraldssundi.

Tað sigur Jørgen Niclasen, landsstýrismaður, sum hevur svarað Eyðgunn Samuelsen, løgtingskvinnu, um byrgingina í Haraldssundi.

Jørgen Niclasen sigur, at byrgingin, um er 350 metrar long og 20 metrar breið, er ongantíð gjørd liðug.

Landsverk fekk í 2008 pengar til at gera eina verkætlan, so byrgingin kundi gerast liðug. Arbeiðið var klárt at bjóða út tá. 

32 mió. kr.

Tað var mett at kosta 32 mió. kr.

Ikki er neyðugt at brúka bergholsgrót, tí ætlanin er at endurnýta tilfarið í verandi byrging.

Stórt grót skal eisini brúkast, men tað má takast úr einum grótbroti.

Jørgen Niclasen sigur, at sambært langtíðarløguætlanini verður byrgingin um Haraldssund gjørd í 2027 og 2028.