- Tíðindi, mentan og ítróttur
Nú er J&K Petersen eisini sloppin upp í part
![](https://kvf.fo/sites/default/files/styles/grein-ovasta-mynd/public/famjinstunnil.jpg?itok=eKySu-fn)
Allar fyritøkurnar, sum hava søkt um undangóðkenning at gera Fámjinstunnilin, eru góðkendar at bjóða upp á verkætlanina.
Tað boðar Landsverk frá í dag.
Fyritøkurnar eru Articon, J&K Petersen og MT Højgaard.
Fyritøkurnar fáa í næstum atgongd til sjálvt útbjóðingartilfarið, og eftir ætlan skulu tilboðini vera Landsverki í hendi fyrst í desember.
Landsverk væntar, at klárt verður at gera sáttmála um arbeiði fyrst í komandi ári.
Søktu aftur
Hetta er aðru ferð, at søkt varð eftir fyritøkum til undangóðkenning til Fámjinstunnilin.
Fyrra undangóðkenningin bleiv avlýst, tí Fíggjarmálaráðið fekk eina kæru frá J&K Petersen um, at ógreitt var, nær freistin til fyrra umfar var.
J&K Petersen fekk viðhald í kæruni.
1200 metrar
Nýggi tunnilin verður umleið 1200 metrar langur.
Verkætlanin fevnir eisini um umleið 1000 metrar av landsvegi oman fyri Ørðavík og umleið 400 metrar oman fyri Fámjin. Nýggjar íbindingar skulu eisini gerast oman fyri Ørðavík og Fámjin til gomlu farðleiðina upp um Ørðaskarð.
Samlaða vegalongdin verður umleið 2.600 metrar.
Verkætlanin er mett at verða liðug í seinasta lagi á sumri 2024.