Neyðugt at loysa avbjóðingar í samvinnuni við Ísland

Tað er neyðugt at loysa tær afturvendandi avbjóðingarnar í okkara samvinnu við Ísland. 

Tað sigur Bárður á Steig Nielsen, løgmaður, sum hevur havt fund við íslendska forsætisráðharran, Katrín Jakobsdóttir. 

Fundurin var í Reykjavík. 

- Síðani Hoyvíkssáttmálin varð settur í gildi í 2006, hava verið atfinningarsamar røddir í Føroyum, og seinastu 15 árini hava verið nógv ymisk mál, ið Føroyar hava strongt á fyri fáa avgreidd. Skal samvinnan millum Føroyar og Ísland styrkjast, er tað er avgerandi, at vit loysa tær avbjóðingar, ið støðugt taka seg upp, sigur Bárður á Steig Nielsen, løgmaður.

Á fundinum við íslendska forsætisráðharran varð nýggja íslendska frágreiðingin um viðurskiftini við Føroyar umrødd. Frágreiðingin kann vera við til at betra um samvinnuna millum londini. 

Alivinna og ferðavinna

Løgmaður heldur, at tað eru møguleikar fyri einum styrktum samstarvi við Ísland - ikki minst innan alivinnu og ferðavinnu.

- Føroyar og Ísland eru brøðratjóðir. Okkara lívstreytir í norðurhøvum líkjast nógv, og tí er upplagt, at vit samstarva meira. Eg haldi til dømis, at íslendingar kunnu læra nógv av okkara dugnaligu alivinnu, meðan føroyska ferðavinnan kann eisini læra nakað av royndunum hjá Íslandi, heldur løgmaður.

Umframt fundin við íslendska forsætisráðharran, skifti løgmaður eisini orð við Guðlaugur Þór Þórðarson, uttanríkisráðharra, um viðurskiftini millum Føroyar og Ísland.